|
Kortlagðar frásagnir af árferði fyrr á öldum |
|
Lýsingar á árferði á Íslandi fyrr á öldum má meðal annars finna í annálum sem ritaðir hafa verið í gegnum tíðina. Frásagnirnar einkennast iðulega af miklum harðindum, sem til dæmis má rekja til landskjálfta, eldgangs, snjóþunga, sjóstorma, hafíss auk annars sem hafði áhrif á lífsviðurværi og afkomu manna.
Merktar hafa verið inn á kort nokkrar frásagnir sem tengja saman loftslag og haf- og fiskveiðimenningu Íslendinga. Heimildirnar eru Íslands Árbækur í sögu-formi eftir Jón Espólín og Djáknaannálar, en frumgerð þeirra er skrifuð af Tómasi Tómassyni og Hallgrímur Jónsson hreinritaði.
Kortið má finna hér. |
|
|
Sjóskaðar á árunum 1734-1794 |
|
Frásagnir af sjósköðum á árunum 1734-1794 hafa verið teknir saman og atburðirnir merktir inn á tímaás. Nýta má tímaásinn til að öðlast skilning á umfangi þess háska er steðjaði að íslenskum sjófarendum á átjándu öld. Heimildirnar eru fengnar úr Djáknaannálum, sem gefnir voru út af Hinu íslenzka bókmenntafélagi í Reykjavík árið 1987.
Hér má finna tímaásinn. |
|
Veðurfarslýsingar úr Íslands Árbókum í sögu-formi |
|
Jón Espólín var fæddur á Espihóli í Eyjafjarðasveit árið 1769. Faðir hans, Jón Jakobsson var sýslumaður og móðir hans, Sigríður Stefánsdóttir var systir Ólafs Stephensen stiftamtmanns. Jón fékk fína barnamenntun á Íslandi og faðir hans kostaði hann til háskólanáms í Kaupmannahöfn sem hann lauk árið 1792. Hann giftist Rannveigu Jónsdóttur, sem var af fátækri fjölskyldu, þrátt fyrir hótanir frá föður sínum og frændum sem leist illa á ráðahag Jóns. Rannveig var Jóni til framdráttar og reyndist honum ómetanleg, hún var myndarleg og framsýn búkona og fór skynsamlega með alla fjármuni. Jón gegndi sýslumannsembættum hingað og þangað um landið samhliða grúski og skrifum, en hann var mikill áhugamaður um sögu. Jón lést árið 1836 og var jarðsettur í Flugumýrarkirkjugarði.
Íslands Árbækur í sögu-formi voru skrifaðar af Jóni Espólín, sem heimildasafn um árferði og annað sem átti sér stað á Íslandi á árunum 1263-1832.
Frásögnum af árferði úr Íslands Árbókum hefur verið safnað saman og finna má gögnin hér. |
|
Veðurfarslýsingar úr Djáknaannálum |
|
Djáknaannálar fjalla um atburði sem áttu sér stað á Íslandi á árunum 1731-1794. Höfundur frumgerðar Djáknaannálanna er Tómas Tómasson, fæddur 12. apríl 1756 að Þóroddsstöðum í Hrútafirði og lést árið 1811. Tómas útskrifaðist úr Hólaskóla árið 1775 og bjó að Þóroddsstöðum til 1789 og var um tíma hreppstjóri í Hrútafirði. Eftir það flutti hann að Stóru-Ásgeirsá í Víðidal, þar sem hann starfaði sem bóndi og hreppstjóri til æviloka. Að Tómasi látnum hreinritaði Hallgrímur Jónsson djákni á Sveinsstöðum í Þingi Djáknaannála og jók jafnframt við hann. Hallgrímur var fæddur 12. október 1780 í Skagafirði.
Frásögnum af árferði í Djáknaannálunum hefur verið safnað saman og hægt er að nálgast þær hér.
|
|
|
|
|
|
